逆流大叔好好睇：很久沒有看過好看的電影，而且是港產片，《逆流大叔》就是好好看，一致好評絕非過譽。
有笑，有淚，有熱血，有溫情，有哲理，有批判，本土，貼地，寫實，將呢啲元素共冶一爐而唔扮嘢嘅小品，加上一班好演員，有青春，仲有佬嘅回春，真係好耐冇試過睇港產片睇得咁開心又咁回味。
進入第三周，雖然是細院，但今晚幾乎全院滿座，口碑不脛而走，大家自然識貨入場支持，叫人高興。
新進導演陳詠燊，在電影界就肯定不新。《逆流大叔》上之前大半年有多，佢逢星期四喺蘋果寫「辦公室政治學」，睇了兩期就覺得有料到，當中講嘅管理經驗和辦公室人生百態非常到肉，於是個個星期睇，有啲仲KEEP起咗。估唔到佢嗰時就係拍緊呢套戲，唔怪得個故仔講啲辦公室嘢咁鬼正。
早排余香凝因感情事上晒新聞，其實我唔知道佢係邊個，但我知網友睇完《逆流大叔》都大讚佢靚女。初頭一睇，我以為係陳嘉桓。咁我睇完，明晒，套戲將余香凝拍得好陽光好靚，唔怪得令人留下深刻印象。有咁嘅教練，真係大叔都練龍舟。
（呢段微微劇透）
同行的人問：點解佢哋最後穿「英雄本色」。我呢啲真大叔，睇《英雄本色》唔係睇經典台重播，係跟家姐喺樂聲戲院入場坐半個位睇嘅（今日後生唔知係咩了），呢套戲我睇咗十幾廿次，裏面有一句永遠精彩嘅對白，就係Mark哥同豪哥講：
「（我咁樣做）唔係要證明我威，係要話畀人聽，我唔見咗嘅嘢我自己攞返！」
戲中各大叔唔見咗乜嘢？唔見咗樽鹽呀！
未睇快啲睇，重溫睇港產片的愉快情懷。
題為編輯所擬