（梗係劇透啦）
0《無雙》是否爛片，應該冇咩異議。但若問收唔收貨，則要看你手上戲票幾錢，70蚊以下的話，我覺得都可接受的。
1 劇情犯駁，欲語還休卻詞不達意，撚橋撚到唔撚知去撚左邊的情況，頗誇張。已去到妨礙理解的地步，看來不是刻意製造歧義。
在周家怡自己個腦極速運作了一次「真相」之中︰秀清其實好大權力，似乎佢才是真正老闆，而不是郭富城，否則張松枝等為甚麼會用槍指嚇郭？（到最後，張松枝等三人根本不知點解死，反邏輯，零提示。）另方面，一開始令方中信放人的，不是駱應鈞的口才，或郭富城的證供，而是秀清背後龐大的政治權力。
但如果秀清是真正老闆，為甚麼會慘到被人安排換面？抑或偽鈔成員還有第七人？
最後周家怡見了阮文，卻沒有追問在酒店房內發生咩事，其實阮是唯一證人，真相應該那時候才揭發。
2 東抄西抄是真。發哥對白小小肉酸相當造作，也是事實。郭先生永遠唔好睇及冇說服力，亦係原罪。
但整體演員發揮都算開心的，周家怡男性化造型甚靚，張建聲自《反黑》後已變了「招積」型古惑仔的 typecast。智叔係A+++，完全冇根的 plot driven 劇本都在短短十場八場之間做到超完整。張靜初慘啲，花好多真力做一大堆認真感情戲，但冇人明係啲感情係邊度黎。
3 但我覺得整個敘事，從敘事層次（而非邏輯）係講得通的。
a 周家怡俾秀清寸完佢第時會忘記王耀慶之後，問一個唔識的男人借火機，突然重複邂逅的感覺。沒有人是唯一／不可取代的。
作為感情線的結論，這一幕預敘、嘲諷及評價後面的情節，這個 ok。
b 智叔最後一幕和郭富城的對答，不是來自阮文的回憶，而是天眼的敘事者，因為阮文肯定睇唔到果個情景。
智叔的勸戒是郭要安份做「觀眾」，這和郭設計出來的周潤發，那種無論如何要做「主角」的強烈慾望，構成了「冇好結果」的下場。這是犯罪線的結論。老土啲囉，都算可接受。
c 不斷借用經典，既係抄襲，又係認真，更係翻新。無論抄得好唔好，整個仿真的概念——「假貨可以比真貨好」、「任何事做到極致就係藝術」——也是香港導演，乃至文化工作者，在近年思考 survival 時的自況自喻，或自我安慰。
觀眾可以唔同意莊文強的觀點，但這種觀點也算是有高度的想法，加上人格分裂的劇情，冚家產的結局，我覺得都是一個有力的 statement，至少不容易抹煞。
唯一問題是，我張戲飛唔止70蚊……