基斯杜化路蘭，二千年嘅時候拍咗套《凶心人》打響名堂；三套蝙蝠俠令佢事業更上一層樓；一零年嘅《潛行兇間》令全世界爭論里安納度究竟有冇離開夢境；而最新作品《天能》亦都得到廣大嘅關注。
基本上關於時間穿越嘅題材，無論係書，電視或者電影都可謂「玩到爛曬」，電影中不得不提《復仇者聯盟》，電視劇例子有英國長壽節目《異世奇人》（Doctor who)，例子實在多不勝數，而《天能》提出嘅時間逆行確是一個頗為新穎嘅概念。
《天能》原定7月17號上映，因為疫情關係延期至9月10日，而筆者有幸喺上畫第一日就入戲院率先欣賞。
電影上映之前大眾都預期如俗話齋：「睇到頭都爆」，筆者抱住一個入去拆解迷題嘅心態，預想劇情會非常複雜。
然而電影比預期中簡單，可能因為筆者有不少關於時間旅行嘅電影同電視劇嘅經驗，筆者覺得電影內容利落順暢交代，而編劇亦巧妙安排咗唔少表面指導主角，實則指導觀眾嘅鏡頭，觀眾可以輕易跟上，完全畀到觀眾代入感，在結局上亦不似《潛行空間》中留下不確定的因素。
電影中嘅主角演員係約翰大衛華盛頓（John David Washington），曾經出演上屆奧斯卡得將作品-《黑白三K黨》，遺憾嘅係電影並冇喺香港上映，非常推薦大家有機會就去睇一睇。而在《天能》電影中亦有所發揮，尤其是與波里活著名女演員蒂普·卡柏迪亞（Dimple Kapadia）幾場對手戲中實在出色。
而電影中嘅第二主角在香港就出名得多，羅拔柏迪臣（Robert Pattinson）在《哈利波特》中飾演西追迪哥里開展佢嘅演藝路途，《吸血新世紀》更加成為主角風靡萬千少女，最近亦被選角成為新一年蝙蝠俠，雖然飽受評擊，但亦似勢在必行。
筆者都係一個修讀科學嘅人，一開頭睇到時間逆轉就覺得係一個非常有趣嘅理論，電影中講述嘅係一種逆向嘅能量守恆定律，最大的疑惑就是我們理解不了當中能源轉變的形式，然而編劇都非常出色，安排電影中其中一個角色講：「唔好嘗試去理解，憑感覺。」
無錯，佢講出睇科幻片嘅金科玉律。
睇科幻片有一個金科玉律，就係千其唔好要求科幻電影符合你認知嘅物理定律，探討電影中嘅科學原理係幾有趣嘅，但唔好太執著，例如當你睇星戰嘅時候，如果你執著於原力，光劍同雷射槍嘅科學原理，你永遠理解唔到電影中嘅樂趣。
最緊要嘅係，冇人真正知道時間逆行會發生咩事，冇人可以證明編劇啱，同樣冇人可以證明編劇錯。
而且電影中有不少嘅動作鏡頭，配合時間逆行穿插於打鬥當中，而且實景拍攝，不惜撞毀真正的飛機為求拍出良好畫面，營造非常出色的視覺效果，可謂貫徹路蘭的風格，在奧斯卡的最佳視覺效果上都確有一席位。
然而電影中亦有不如理想的部分，電影中有嘗試刻畫角色及描述角色之間的關係，但兩者都不如理想，但或許是時間所限，在角色的形象刻劃明顯不足。
例如在同類型作品 -《潛行空間》中，里安納度與亡妻的感情關係令人記憶猶新，尤其是在深層夢境崩潰中對話的一幕，而且把角色細緻刻畫，確是出色，但在《天能》中就未見如此。
為咗避免劇透，可以講嘅都只係得咁多，不過《天能》仍然是一套出色嘅科幻電影，娛樂性及啟發性亦十足，非常建議大家入場觀看。